Heilsuleikskólinn Skógarás býður börnum upp á kærleiksríkt, öruggt og uppbyggjandi umhverfi þar sem hvert barn fær að njóta sín á eigin forsendum. Lögð er áhersla á að venja börnin við heilbrigðan lífsstíl sem vonast er til að fylgi þeim inn í fullorðinsárin.

Skólinn starfar eftir Heilsustefnu Unnar Stefánsdóttur sem byggir á heilsueflandi vinnubrögðum með áherslu á næringu, hreyfingu og sköpun í leik. Markmið skólans er að stuðla að heilsueflingu leikskólasamfélagsins og að vellíðan barna sé höfð að leiðarljósi í einu og öllu.

Hreyfing og sköpun

Í Heilsustefnunni er unnið markvisst með hreyfingu og sköpun.
Öll börn fá skipulagðar stundir með sérhæfðum kennurum.

Þessar stundir eru fyrirfram skipulagðar og tengjast bæði:

• þáttum sem prófaðir eru í Heilsubók barnsins,
• áherslum og verkefnum skólans hverju sinni.

Hreyfing og sköpun eru mikilvægir þættir í heilsueflingu og stuðla að sjálfstrausti, gleði og þroska í leik og námi.

Næring og matargerð

Heilsuleikskólar kappkosta að stuðla að góðri næringu barna.
Heilsustefna Unnar Stefánsdóttur byggir á næringarstefnu sem fylgir opinberum leiðbeiningum um mataræði leikskólabarna.

Í Skógarási er lögð rík áhersla á:

• fjölbreytni í fæðuvali,
• að elda mat frá grunni,
• að samsetning matseðla stuðli að ráðlögðum dagskammti (RDS) sé náð,
• að móta heilbrigðar matarvenjur til framtíðar.

Fjölbreytt mataræði, góð hráefni og vandaður matartími eru mikilvægir þættir í vellíðan barnanna.

Málstefna – Málgleði í Skógarási

Málstefna Heilsuleikskólans Skógaráss, Málgleði, leggur áherslu á að stuðla að jákvæðri, fjölbreyttri og lifandi málnotkun í öllu starfi.
Málnotkun skiptir máli – vandað orðaval, framburður og framsetning eru hluti af daglegri málörvun barna.

Íslenska er skólamálið og foreldrasamstarf fer fram á íslensku, en virðing er borin fyrir móðurmáli hvers barns og fjölbreytileika tungumála.

Heillaspor

Heillaspor er heildstæð og barnmiðuð leið í skólastarfi Skógaráss sem stuðlar að velferð, öryggi og virkri þátttöku barna í inngildandi leikskólasamfélagi.
Lögð er áhersla á að skapa menningu þar sem börn upplifa að þau skipti máli, að á þau sé hlustað og að þau fái að þroskast í umhyggjusömu og öruggu umhverfi.

Grunnhugsunin er sú að tilfinningalegt öryggi og tengsl eru forsenda náms og vellíðunar.
Börn læra best þegar tengsl milli barna og fullorðinna eru jákvæð, stöðug og áreiðanleg og þegar þau finna að styrkleikar þeirra eru virtir og byggt er á hæfni þeirra.