Leikskólabyrjun – upplýsingar fyrir nýja foreldra

Að byrja í leikskóla er stór áfangi í lífi barns og foreldra. Fyrstu dagarnir fela oft í sér breytingar á rútínu og geta valdið bæði spenningi og óvissu. Til að styðja vel við barnið, foreldra og starfsfólk hefur leikskólinn mótað skýrt skipulag við leikskólabyrjun sem kallast aðlögun.

Leikskólinn er fyrsta skólastigið og er ekki staðgengill heimilisins. Starfsfólk er ekki staðgengill foreldra, heldur samstarfsaðilar í námi og þroska barnsins. Leikskólinn er samfélag þar sem fullorðnir og börn byggja sameiginlega upp þekkingu og reynslu, og þar sem barnið er virkur þátttakandi í eigin námi.

Í samræmi við þessa hugmyndafræði vinnur skólinn með þátttökuaðlögun, þar sem foreldrar taka virkan þátt í fyrstu dögum barnsins í leikskólanum, þannig að umskiptin verði eins mild og hægt er.

Þátttökuaðlögun

Þátttökuaðlögun byggir á því að:

• barnið sé ekki „skilið eftir“ í leikskólanum strax,
• foreldrar taki virkan þátt í starfinu fyrstu dagana,
• barnið læri að vera í nýju umhverfi í öruggu samstarfi við foreldra og starfsfólk,
• foreldrar kynni sér skólastarfið í verki og öðlist traust og yfirsýn.

Þessi aðferð styður við öryggi barnsins og hjálpar því að mynda jákvæð tengsl frá fyrsta degi.

Skipulag aðlögunar

Dagur 1 – kl. 9:00–11:00

Foreldrar og börn mæta saman á deild.
Foreldrar eru inni á deildinni allan tímann og sinna sínum eigin börnum: skipta á þeim, aðstoða við máltíðir, leika og styðja þau í nýjum aðstæðum.

Dagur 2 – kl. 9:00–12:00

Foreldrar halda áfram að taka fullan þátt í starfi deildarinnar.
Starfsfólk heldur utan um skipulag dagsins, leiðir samveru og verkefni, en foreldrar eru nærverandi og sinna börnunum sínum.

Dagur 3 - kl.9:00-14:00

Foreldrar halda áfram að taka fullan þátt í starfi deildarinnar.

Starfsfólk heldur utan um skipulag dagsins, leiðir samveru og verkefni, en foreldrar eru nærverandi og sinna börnunum sínum.

Dagur 4

Börnin koma í leikskólann um morguninn, kveðja foreldra og taka þátt í daglegu starfi.
Foreldrar eru þó hvattir til að vera tilbúnir að stytta daginn fyrstu dagana ef barnið þarf á því að halda.

Kostir þátttökuaðlögunar

Þátttökuaðlögun byggir á þeirri trú að öryggi foreldra smiti yfir á barnið.
Það skilar sér í því að barnið:

• upplifir öryggi og ró í nýju umhverfi,
• fær að læra nýjar aðstæður í nærveru sinna nánustu,
• myndar traust til starfsfólks þegar það sér foreldra vinna með þeim.

Foreldrar upplifa einnig:

• að þeir verði heimavanir í leikskólanum,
• að þeir fái skýra mynd af starfinu og dagskipulagi,
• að þeir kynnist starfsfólki, öðrum foreldrum og barnahópnum,
• að það myndist traust foreldranna á milli, sem styrkir foreldrasamfélagið.

Leikskólakennarar lofa yfirleitt þátttökuaðlögun fyrir:

• aukna nánd og traust í upphafi skólans,
• betri grunn fyrir áframhaldandi samskipti og samstarf,
• jákvætt upphaf skólagöngu barnsins.