Fatnaður

Innifatnaður er vinnufatnaður barnsins í leikskólanum og þarf að henta þeirri virkni og þeirri starfsemi sem fer fram yfir daginn. Útifatnaði skal haga eftir veðri hverju sinni, og mikilvægt er að barnið hafi aukaföt til skiptanna, þar sem leikir, útivera og dagleg verkefni geta kallað á fleiri skipti.

Foreldrar fylla fatahólf barnsins af nauðsynlegum fatnaði á mánudögum og eftir þörfum.
Foreldrar bera ábyrgð á að barnið sé ávallt með nægan fatnað, en kennarar láta vita ef eitthvað vantar.
Allur fatnaður þarf að vera merktur með fullu nafni barnsins, því merktur fatnaður skilar sér frekar. Skammstafanir og upphafsstafir geta valdið misskilningi.

Mikilvægt er að fatnaður barnanna sé þægilegur og henti leik, þannig að hann takmarki hvorki hreyfingu né leikgleði.
Hafið í huga að börn hreyfa sig mikið úti og geta auðveldlega svitnað ef þau eru of mikið klædd.
Þó starfsfólk reyni ávallt að gæta fatnaðar geta skapandi verkefni, lím, málning og fjölbreytt efni sem notuð eru í leikskólastarfi valdið blettum — vinsamlegast hafið það í huga við val á leikskólafötum.

Tæming taska og hólfa

Til að tryggja gott skipulag og nægilegt rými í fataherbergjum þarf að tæma töskur og taka upp úr þeim á mánudögum.
Hvert barn hefur:

• eina hirslu fyrir aukaföt
• eitt hólf fyrir útiföt

Töskur undan fatnaði eru ekki geymdar í leikskólanum.

Á föstudögum eru börn og foreldrar beðin um að taka öll útiföt heim, þannig að engin föt séu eftir í hólfi barnsins.
Þetta er mikilvægt svo hægt sé að þrífa vel og halda góðu hreinlæti, sem skiptir miklu máli fyrir heilsu og vellíðan allra barna.
Fatahólf sem eru ekki tæmd verða ekki þrifin.