Föstudagsfrétt
12. 04. 2024
Komiði sæl. Í þessari viku vorum við að læra hljóðið Óó sem er sérhljóði. Við gerðum skemmtileg verkefni og leiki með staf vikunnar til að æfa okkur betur með hann.
Við notuðum þessa viku mikið til að undirbúa okkur fyrir leikritið, Karíus og Baktus. Búið er að skipta niður verkum, sumir spila í hljómsveit, aðrir fá leikhlutverk. Sumt þarf að föndra eða búa til, síðan þarf að taka saman búningana o.fl. Okkur tókst að klára nokkra hluti í þessari viku og munum svo halda áfram eftir helgi. Þá ættu allir að vera komin með það sem til þarf og æfingar hafist.
Í þessari viku og seinustu höfum við verið að æfa okkur í sjálfstæðinu. Í morgunhressingunni setjum við bakkana á borð og krakkarnir fá sér sjálfir. Í nónhressingunni gerum við slíkt hið sama, setjum ávextina, grænmetið og brauðið á borð og krakkarnir fá sér. Þetta hefur gengið mjög vel. Í forstofunni geta allir klætt sig sjálfir og þurfa litla sem enga aðstoð.
Elsti árgangurinn er alltaf að æfa sig í að standa fyrir framan hópin og tala. Í vetur höfum við tengt þessi “ræðuhöld” við barnasáttmála Sameinuðu þjóðanna sem fjallar um réttindi barna.
Yngri árgangurinn hefur einnig verið að æfa sig að standa upp og tala fyrir framan hópinn. Við erum að þjálfa þau í heimaþekkingunni, þ.e. fullt nafn, fæðingadagur og ár, nöfn foreldra og systkyna og jafnvel gæludýra.
Takk fyrir frábæra vikur og góða helgi.